SAHAR

دہلی کے وزیر اعلی اروند کیجریوال نے اتوار کو ایک پریس کانفرنس میں سبھی سیاسی جماعتوں اور سیاستدانوں سے اپیل کی کہ کورونا وائرس کے پر سیاست سے گریز کیا جائے۔ انہوں نے کہا کہ اس مسئلے میں سیاست سے انسداد کورونا مہم متاثر ہوگی۔

اروند کیجریوال نے بتایا کہ دہلی میں کورونا کے تقریبا سات ہزار معاملات کا پتہ لگا ہے جن میں سے صرف ڈیڑھ ہزار افراد اسپتالوں میں زیر علاج ہیں اور ان میں سے ستائیس لوگوں کے لئے وینٹی لیٹر کی ضرورت پڑی ہے۔ ان کا کہنا تھا کہ زیادہ تر پازیٹیو کیس ایسے ہیں جن میں یا کوئی علامت نہیں ہے یا معمولی علامتیں پائی گئی ہیں اور انہیں اسپتالوں میں داخل کرانے کی ضرورت نہیں پڑی ہے۔ 

یا دہے کہ بھارتیہ جنتا پارٹی کے متنازعہ لیڈر کپل مشرا نے کورونا کے تعلق سے دہلی حکومت پر سنگین الزامات لگائے تھے۔ دہلی کے وزیر اعلی اروند کیجریوال نے اس پریس کانفرنس میں دوسری ریاستوں کے مزدوروں سے اپیل کی کہ ریاست کو اس طرح چھوڑ کے نہ جائیں۔