SAHAR

اسلامی جمہوریہ ایران کی پارلیمنٹ مجلس شورائے اسلامی کے انتخابات کے لیے امیدواروں کی انتخابی مہم شروع ہو گئی ہے۔

ایران کے دسویں پارلیمانی انتخابات کے لیے جاری کیے گئے پروگرام کے مطابق امیدواروں کی انتخابی مہم آج جمعرات سے شروع ہو گئی ہے۔ ان انتخابات میں چھے ہزار سے زائد امیدوار حصہ لے رہے ہیں۔ جمعرات سے شروع ہونے والی انتخابی مہم ووٹنگ شروع ہونے سے چوبیس گھنٹے پہلے یعنی پچیس فروری کو صبح آٹھ بجے ختم ہو جائے گی۔

اسلامی جمہوریہ ایران کے الیکشن کمیشن کے سربراہ محمد حسین مقیمی نے کہا ہے کہ مجلس شورائے اسلامی اور مجلس خبرگان رہبری کے انتخابات کے لیے رجسٹرڈ ووٹوں کی کل تعداد پانچ کروڑ انچاس لاکھ پندرہ ہزار چوبیس ہے۔ یہ انتخابات ایک ساتھ چھبیس فروری کو منعقد ہوں گے۔