میرجاوہ سے مانچسٹر تک دہشت گردی کی جڑ ایک ہے
اسلامی جمہوریہ ایران نے مانچسٹر کے دہشت گردانہ حملے کی مذمت کرتے ہوئے ہلاک ہونے والوں کے لواحقین سے ہمدردی کا اظہار کیا ہے
اسلامی جمہوریہ ایران کی وزارت خارجہ کے ترجمان بہرام قاسمی نے برطانوی شہر مانچسٹر میں دہشت گردانہ حملے کی مذمت کرتے ہوئے کہا کہ ایران کے سرحدی علاقے میرجاوہ سے برطانوی شہر مانچسٹر تک دہشت گردی کی جڑ ایک ہے اور اس کی بیخ کنی کی جانی چاہئے - ایران کی وزارت خارجہ کے ترجمان نے مانچسٹرسانحے میں ہلاک ہونے والوں کے لواحقین سے ہمدردی کا اظہارکرتے ہوئے کہا کہ دہشت گردی کے خلاف جھوٹے اور جعلی اتحاد بنانے اور دہشت گردوں کو پروان چڑھانے ، ان کی مالی اور اسلحہ جاتی مدد کرنے والوں کا صحیح پتہ نہ بتانے کا ایک نتیجہ دنیا کے مختلف ملکوں میں دہشت گردی کے کینسر کا پھیل جانا ہے - ایران کی وزارت خارجہ کے ترجمان نے کہا کہ دہشت گردی کے کینسر کا خاتمہ دہشت گردی کے سلسلے میں دوہرے معیار سے ہٹ کر صرف اجتماعی کوششوں سے ہی ممکن ہے- واضح رہے کہ گذشتہ چھبیس اپریل کو سعودی عرب اور سامراجی طاقتوں کے حمایت یافتہ دہشت گردوں نے ایران کے سرحدی شہرمیرجاوہ میں پولیس کے ایک گشتی دستے پر حملہ کرکے نو پولیس اہلکاروں کو شہید اور ایک کو زخمی حالت میں پاکستان منتقل کردیا تھا -
