امریکی وعدہ خلافیوں کا بھرپور جواب دیا جائے گا، ایران کا اعلان
اسلامی جمہوریہ ایران نے کہا ہے کہ وہ ایٹمی معاہدے کے تعلق سے امریکا کی وعدہ خلافیوں کا بھرپور عملی جواب دینے کے ساتھ ساتھ واشنگٹن کے خلاف شکایت بھی کرے گا
اسلامی جمہوریہ ایران کی پارلیمنٹ مجلس شورائے اسلامی کے اسپیکر ڈاکٹر علی لاریجانی نے کہا ہے کہ تہران ایٹمی معاہدے کی نگرانی والے مشترکہ کمیشن میں امریکا کی وعدہ خلافیوں کی شکایت کرے گا انہوں نے کہا کہ ایٹمی معاہدے پر عمل درآمد کے تعلق سے امریکا کی وعدہ خلافیاں سب پر واضح ہوچکی ہیں- پارلیمنٹ کے اسپیکر نے منگل کو قم میں نامہ نگاروں سے گفتگو کرتے ہوئے کہا کہ ایران پوری قوت اور درایت کے ساتھ ایٹمی معاہدے کی خلاف ورزی کے تعلق سے امریکی مقاصد کی راہ میں حائل ہوگا اورتہران امریکا کے مقاصد کو پورا نہیں ہونے دے گا - ڈاکٹر لاریجانی نے کہا کہ بعض ملکوں نے بھی صراحت کے ساتھ کہا ہے کہ ایران مخالف امریکی اقدامات ایٹمی معاہدے کی خلاف ورزی ہیں - انہوں نے اس بات کا ذکرکرتے ہوئے کہ امریکی حکام ایٹمی معاہدے پر عمل درآمد کی راہ میں رکاوٹیں کھڑی کرنے کی کوشش کررہے ہیں کہا کہ ایران کے خلاف تازہ پابندیاں عائد کرنے پر مبنی امریکی کانگریس کا فیصلہ ایران میں سرمایہ کاری کے ماحول کو خراب کرنے کے لئے سامنے آیا ہے- واضح رہے کہ پیر کو صدر مملکت ڈاکٹر حسن روحانی کی صدارت میں ایٹمی معاہدے پر نگرانی کرنے والی ایرانی کمیٹی کے اجلاس میں اس بات پر زوردیا گیا ہے کہ اسلامی جمہوریہ ایران امریکی کانگریس کی ایران مخالف پابندیوں کے بل کا مناسب اور بھرپور جواب دے گا - دوسری جانب اسلامی جمہوریہ ایران کے وزیرخارجہ محمد جواد ظریف نے بھی کہا ہے کہ تہران ایٹمی معاہدے پرعمل درآمد کے سلسلے میں امریکا کی وعدہ خلافیوں کا عملی اور قانونی جواب دے گا - وزیرخارجہ جواد ظریف نے منگل کو استنبول میں او آئی سی کے وزرائے خارجہ کے ہنگامی اجلاس کے موقع پر نامہ نگاروں سے گفتگو کرتے ہوئے کہا کہ تہران نے ایسے اقدامات کا آغاز کیا ہے جن کے ذریعے ان پالیسیوں کا مقابلہ کیا جائےگا جو ایٹمی معاہدے کے نتائج کو ایران کے حق میں نکلنے سے روکنے کے لئے وضع کی جارہی ہیں - انہوں نے ایٹمی معاہدے کے خلاف واشنگٹن کی مخاصمانہ پالیسیوں کو ایران کے خلاف واشنگٹن کی دشمنی کی شدت کی علامت بتایا اور کہا کہ امریکی حکام ایٹمی معاہدے کے بعد ایران کے مزید طاقتور اور مقتدر ہونے سے خوف زدہ ہیں