SAHAR

اسلامی جمہوریہ ایران کے وزیر دفاع نے کہا ہے کہ دفاعی صنعتیں ملک کی خودمختاری کا اہم ستون اور وطن کی سلامتی اور استحکام کی اہم ترین ضمانت ہیں۔

پیر کے روز تہران فاتح مبین نامی جدید ترین میزائل کی تقریب رونمائی سے خطاب کرتے ہوئے ایران کے وزیر دفاع بریگیڈیئر جنرل امیر حاتمی نے کہا کہ یہ میزائل تمام رکاوٹوں کو عبور کرنے کی توانائی رکھتا ہے اور اسے دن اور رات کے وقت نیز ہر قسم کے موسمی حالات میں طے شدہ اہداف کو نشانہ بنانے کے لیے استعمال کیاجاسکتا ہے۔انہوں نے کہا کہ فاتح مبین میزائل مکمل طور پر ملکی وسائل اور ٹیکنالوجی سے کام لیتے ہوئے تیار کیا گیا ہے اور ہم ملکی دفاع کے تمام تر وسائل اور آلات کی تیاری میں خودکفیل ہوچکے ہیں۔ایران کے وزیردفاع کا کہنا تھا کہ فاتح مبین میزائل سمیت ملکی دفاع کے میدان میں ہماری کامیابیاں مدتوں تک وطن کے دفاع کی ضامن رہیں گی۔بریگیڈیئر جنرل امیر حاتمی نے یہ بات زور دے کر کہی کہ ہمارے دشمن دنیا بھر سے جدید ترین ہتھیاروں کی خریداری پر بھاری رقمیں خرچ کر رہے ہیں۔انہوں نے واضح کیا کہ ایران ڈیفینس اکنامکس کی بنیاد پر طویل عرصے تک اپنے دفاع کو محفوظ رکھ سکتا ہے۔قابل ذکر ہے کہ پیر کے روز تہران میں ایران کے دفاعی سیکٹر میں تیار کی جانے والی جدید ترین مصنوعات کی رونمائی کی گئی جس میں فاتح مبین میزائل، ورٹیکل ٹیک آف کواڈ کاپٹر ھد ھد چار، کمانڈ اینڈ کنٹرول سسٹم اور فائر پروف ایمونیشن باکس شامل ہیں۔فاتح مبین میزائل ایک ترقی یافتہ گائیڈڈ میزائل ہے جو انتہائی جدید ترین نیویگیشن سسٹم سے بھی لیس ہے اور اسے زمین اور سمندر دونوں جگہ استعمال کیا جاسکتا ہے۔اس میزائل کو کسی بھی موسم میں کسی بھی وقت چلایا جاسکتا ہے اور یہ زمین اور سمندر میں موجود طے شدہ اہداف کو نشانہ بنانے کی پوری توانائی رکھتا ہے۔ھد ھد چار نامی ورٹیکل ٹیک آف کوآڈ کاپٹر سو کلومیٹر کی حدود میں مسلسل چار گھنٹے تک پرواز کرسکتا ہے اور اپنے ساتھ بیس کلو وزن بھی لے جانے کی صلاحیت رکھتا ہے۔کمانڈ اینڈ کنٹرول سسٹم کوڈ کی صورت میں آپریشن میں مصروف یونٹوں کے درمیان صوتی اور تصویری رابطے قائم کرسکتا ہے اور اسے کمپیوٹروں سے منسلک تمام آلات پر آسانی کے ساتھ نصب کیا جاسکتا ہے۔فائر پروف باکس تین گھنٹے تک بارہ سو ڈگری گرمی برداشت کرنے کے ساتھ ساتھ واٹر پروف اور شاکس پروف بھی ہے۔