Feb ۱۳, ۲۰۱۹ ۰۹:۲۷ Asia/Tehran
  • امام خمینی،علامہ اقبال اور مودودی اتحاد امت کے ترجمان

اسلامی جمہوریہ ایران کے حوزہ ہائے علمیہ قم المقدسہ کے سربراہ آیت اللہ علی رضا اعرافی نے ایک بڑے وفد کے ہمراہ امیر جماعت اسلامی پاکستان سینیٹر سراج الحق سے منصورہ میں ملاقات کی، ملاقات میں پاکستان ایران تعلقات کے علاوہ عالم اسلام کی صورتحال پر تفصیلی تبادلہ خیال ہوا۔

اس موقع پرآیت اللہ علی رضا اعرافی نے ایران میں ہونے والے مختلف علمی و تحقیقی منصوبوں پر روشنی ڈالتے ہوئے باہمی تعاون اور رواداری کو عام کرنے پر زور دیا۔ انہوں نے کہا کہ حضرت امام خمینی(رح) ،علامہ محمد اقبال اور سید ابوالاعلیٰ مودودی اتحاد امت کے اصل اور حقیقی ترجمان تھے۔

ملاقات میں امیر جماعت اسلامی نے کہا کہ باہمی اتحاد و یکجہتی امت مسلمہ کے لیے راہ نجات ہے، دشمن ہمیں مختلف تعصبات کا شکار کرکے تباہ کرنے پر تلا ہوا ہے، لیکن قرآن کریم ہمیں بار بار متنبہ کر رہا ہے کہ باہمی اختلافات سراسر ہلاکت ہے۔

انہوں نے کہا کہ پورے عالم اسلام میں ظلم و ستم اور قتل و غارت گری کو ہوا دی جا رہی ہے، علمائے حق کا فرض ہے کہ اس نازک موڑ پر ہر مظلوم کا ساتھ دیتے ہوئے امت کو مشترکات پر اکٹھا کر دیں۔

سینیٹر سراج الحق نے کہا کہ ضرورت اس امر کی ہے کہ اسلام کی برحق تعلیمات کی روشنی میں دور حاضر کے معاشی، معاشرتی و اخلاقی چیلنجز کا حقیقی اور عملی حل پیش کیا جائے۔

 

ٹیگس