SAHAR

ایرانی عدلیہ کی انسانی حقوق کمیٹی کے سیکریٹری علی باقری کنی نے امریکی اتحادیوں بالخصوص یورپی ملکوں پر امریکا کی غیر قانونی اور ظالمانہ پابندیوں پر عمل در آمد کی وجہ سے سخت تنقید کی۔ انھوں نے کہا کہ بعض یورپی ملکوں میں امریکا کی ایران مخالف اقتصادی دہشت گردی کا دائرہ کھانے پینے کی چیزوں ، دواؤں اور طبی وسائل تک پہنچ گیا ہے۔ 

انھوں نے کہا کہ ایک یورپی ملک جو اس سے پہلے، ایران کے خلاف غیر انسانی قرار داد کا بانی بن چکا ہے، اس وقت ایران کے لئے دواؤں اور طبی وسائل حتی ایک مخصوص بیماری کی مخصوص بینڈیج کی ترسیل میں بھی رکاوٹیں ڈال رہا ہے۔ 

انھوں نے کہا کہ یورپ والے خود کو انسانی حقوق کا علم بردار کہتے ہیں ، انہیں شرم آنا چاہئے کہ موجودہ حالات میں جب ہر جگہ کورونا وائرس پھیل رہا ہے، اس طرح کے غیر انسانی اقدامات کر رہے ہیں۔

انھوں نے کہا کہ جو ممالک کورونا وائرس کے خلاف مہم میں ایران کے ساتھ تعاون نہیں کررہے ہیں، وہی دنیا میں اس وحشتناک وائرس کے پھیلنے کے ذمہ دار ہیں۔ ایرانی عدلیہ کی انسانی حقوق کمیٹی کے سیکریٹری نے کہا کہ وہ یورپی حکام اور بین الاقوامی اداروں کے ذمہ داران، جو ایران کے لئے دواؤں کی سپلائی میں رکاوٹ ڈال رہے ہیں ، وہ امریکا کے جرم میں برابر کے شریک ہیں۔