May ۲۵, ۲۰۱۷ ۲۰:۵۶ Asia/Tehran
  • صرف ایران نے ہماری مدد کی، حزب اللہ لبنان کے سربراہ کا بیان

حزب اللہ کے سربراہ نے کہا ہے کہ جنوبی لبنان کو صیہونی حکومت کے قبضے سے آزاد کرانے میں صرف اسلامی جمہوریہ ایران نے مدد کی تھی۔

حزب اللہ کے سربراہ سید حسن نصراللہ نے جنوبی لبنان کی آزادی کی سالگرہ پر ایک تقریب سے خطاب میں کہا کہ جب جنوبی لبنان پر غاصب صیہونی حکومت نے قبضہ کر لیا تو اسلامی ملکوں کی تنظیم او آئی سی، عرب لیگ، امریکہ اور اقوام متحدہ میں سے کسی نے بھی لبنان کی کوئی مدد نہیں کی۔

انھوں نے کہا کہ جنوبی لبنان کو صیہونی حکومت کے قبضے سے آزاد کرانے میں صرف اسلامی جمہوریہ ایران نے مدد کی تھی۔ سید حسن نصراللہ نے حزب اللہ اور فوج کے اتحاد کو سن دو ہزار میں غاصب صیہونی حکومت کے فوجیوں کو مقبوضہ علاقوں سے پیچھے دھکیلنے میں کامیابی کا راز قرار دیا۔

انھوں نے کہا کہ قبضے کے دوران پورے پندرہ سال مغربی ممالک غاصب صیہونی حکومت کے ساتھ اور اس کے قبضے کی حمایت کرتے رہے۔

سید حسن نصراللہ نے ریاض میں امریکہ اور بعض مسلم ملکوں کے سربراہوں کے اجلاس کی طرف اشارہ کرتے ہوئے کہا کہ اس اجلاس میں لبنان کے بارے میں جو کچھ کہا گیا اس سے لبنان کی صورتحال میں کوئی فرق آنے والا نہیں ہے۔

انھوں نے کہا کہ ہم نے لبنان میں سیاسی اختلافات کو دور کرنے پر اتفاق کیا ہے لیکن اقتصادی اور سلامتی سے متعلق امور میں ہم اپنے موقف پر بدستور باقی ہیں۔