SAHAR

عراق کی سیکورٹی فورس نے ملک کے شمالی شہر بیجی کے قریب ایک آپریشن کے دوران داعش کے متعدد دہشت گردوں کو ہلاک کر دیا۔

عراق کے صوبہ صلاح الدین کے گورنر احمد عبداللہ الجبوری نے کہا ہے کہ عراقی فورس نے بیجی شہر سے پندرہ کلومیٹر دور السّلام نامی گاؤں میں کارروائی کرتے ہوئے دہشت گردوں کے ٹھکانوں کو نشانہ بنایا-

صلاح الدین کے گورنر کا کہنا ہے کہ دہشت گرد عناصر صوبے کے شہروں میں داخل ہو کر سیکورٹی فورس اور عام شہریوں پر دہشت گردانہ حملہ کرنا چاہتے تھے-

صلاح الدین کے گورنر نے اس سے پہلے ہی خبردار کر دیا تھا کہ دہشت گرد، صوبہ صلاح الدین کے شہروں میں حملے کر سکتے ہیں-

دریں اثنا عراقی فیڈرل پولیس کے سربراہ شاکر جودت نے کہا ہے کہ موصل کے قدیم علاقے میں داعش کے متعدد عناصر کو محاصرے میں لے لیا گیا-

ان کا کہنا تھا کہ داعش کے عناصر موصل کے بچوں اور خواتین سے خودکش حملوں کا کام لے رہے ہیں۔