اردن میں اسرائیل مخالف مظاہرے
Jul ۲۶, ۲۰۱۷ ۱۰:۱۵ Asia/Tehran
اردن کے عوام نے اسرائیل مخالف مظاہرہ کرتے ہوئے اس ملک میں اسرائیلی سفارت خانے کو فوری طورپر بند کرنے کا مطالبہ کیا۔
اردن کے دارالحکومت عمان میں واقع اسرائیلی سفارت خانے میں گزشتہ دنوں ہونے والی فائرنگ سے جاں بحق ہونے والے اردن کے 16 سالہ لڑکے کے جلوس جنازہ میں شامل ہزاروں لوگوں نے اسرائیل کے خلاف نعرے لگاتے ہوئے اسرائیلی سفارت خانہ بند کرنے کا مطالبہ کیا۔ مظاہرین "اردن کی سرزمین پر اسرائیلی سفارت خانہ یا سفیر نہیں "کے فلک شگاف نعرے لگارہے تھے۔
اردن کی پولیس کا کہنا ہے کہ اسرائیلی سفارت خانے کے سیکورٹی گارڈ کی فائرنگ سے 2 اردنی شہری جاں بحق ہوگئے تھے جس کے بعد سے اس ملک میں اسرائیل کے خلاف احتجاج کا سلسلہ شروع ہوا۔
بعض اطلاعات کے مطابق ہونے والے اسرائیل مخالف مظاہروں کے بعد اسرائیلی سفارتکار اردن سے چلے گئے ہیں۔
