عراقی کردستان میں پیٹرول پمپوں پر ہجوم
Sep ۲۵, ۲۰۱۷ ۱۴:۱۵ Asia/Tehran
عراقی کردستان کے مقامی ذرائع نے رپورٹ دی ہے کہ عراقی کردستان میں پیٹرول اور غذائی اشیا کی ممکنہ قلت کے پیش نظر لوگ پیٹرول پمپ اور دوکانوں پر جمع ہو گئے ہیں۔
العالم کی رپورٹ کے مطابق عراقی کردستان کے صوبے سلیمانیہ میں لوگ بڑی مقدار میں غذائی اشیا خرید رہے ہیں اور دوکانوں پر بھیڑ لگی ہوئی ہے جبکہ یہی صورت حال پیٹرول پمپ کی بنی ہوئی ہے اور سڑکوں پر کاروں اور گاڑیوں کی لمبی لمبی قطاریں لگی ہوئی ہیں۔
ایک عراقی ذریعے نے پیٹرول پمپ کی طرف جانے والے راستوں میں ٹریفک کی بحرانی صورت حال کی طرف اشارہ کرتے ہوئے کہا ہے کہ بعض پیٹرول پمپوں پر پیٹرول ختم ہو گیا ہے۔