مصر میں عیدالفطر کے پہلے روز حملہ 8 پولیس اہلکار ہلاک
Jun ۰۶, ۲۰۱۹ ۰۹:۴۳ Asia/Tehran
مصر کے صحرائے سینا میں عیدالفطر کے موقع پر دہشت گردوں کے چیک پوسٹ پر حملے میں 8 پولیس اہلکار ہلاک ہو گئے۔
غیر ملکی خبر رساں ایجنسی اے ایف پی کی رپورٹ کے مطابق مصر کی وزارت داخلہ کے بیان میں کہا گیا کہ دہشت گردوں نے العریش کے مغرب میں موجود چیک پوسٹ کو نشانہ بنایا، فائرنگ کے تبادلے میں 5 حملہ آور مارے گئے جبکہ 8 پولیس اہلکار ہلاک ہوئے۔
بیان میں کہا گیا کہ کچھ دہشت گرد موقع پاکر فرار بھی ہوئے جن کی نقل و حرکت پر سیکیورٹی فورسز نظر رکھے ہوئے ہے۔
ذرائع نے کہا کہ اس وقت پولیس اور آرمی کے اہلکار چیک پوسٹ کا محاصرہ کیے ہوئے ہیں۔
واضح رہے کہ مصر کے شمال مشرقی خطے میں دہشت گرد تنظیم داعش طویل عرصے سے سرگرم ہے جہاں سیکیورٹی فورسز پر اکثر حملے کیے جاتے ہیں۔
