SAHAR

لیبیا کی قومی وفاق کی حکومت اور مشرقی شہر طبرق میں قائم خود ساختہ حکومت کے عہدیداروں نے قومی بجٹ تیار کرنے کے بارے میں تبادلہ خیال کیا ہے۔

اسکائی نیوز کی رپورٹ کے مطابق لیبیا کی قومی وفاق کی حکومت کی وزارت خزانہ نے اعلان کیا ہے کہ وفاقی حکومت اور طبرق حکومت کے بعض حکام نے شہر البرقہ میں ملاقات اور گفتگو کی ہے۔ لیبیا کے ان حکام کی ملاقات کا مقصد قومی بجٹ پر اتفاق رائے پیدا کرنا تھا۔

لیبیا کی وزارت خزانہ کے بیان کے مطابق فریقین، موجودہ مالی سال کے بجٹ کو حتمی شکل دینے کے لئے مل کر کام کریں گے۔

لیبیا کا قومی بجٹ اس عبوری حکومت کے سامنے پیش کیا جائے گا جو ملک کا نظام چلانے اور صدارتی اور پارلیمانی انتخابات کرانے کے لئے دوہزار اکیس کے آخر میں تشکیل دی جائے گی۔