سیکڑوں عراقی قبائلی عوامی رضاکار فورس میں شامل
Sep ۲۱, ۲۰۱۵ ۱۰:۵۴ Asia/Tehran
عراق کے صوبہ الانبار کی صوبائی کونسل کے ایک رکن نے کہا ہے کہ اس صوبے کے قبائل کے پانچ سو سے زائد افراد دہشت گردوں کے خلاف لڑنے کے لیے عوامی رضاکار فورس میں شامل ہو گئے ہیں۔
السومریہ نیوز کے مطابق الانبار کی صوبائی کونسل کے رکن "ارکان خلف الطرموز" نے کہا ہے کہ اس صوبے کے دو قبیلوں البومرعی اور البوغانم سے تعلق رکھنے والے پانچ سو سے زائد افراد نے رضاکار فورس میں شامل ہونے کے لیے اپنی آمادگی کا اعلان کیا ہے-ارکان خلف الطرموز نے کہا کہ ان افراد کے رضاکار فورس میں شامل ہونے کا مقصد دہشت گرد گروہ داعش کا مقابلہ کرنا، الحبانیہ، المجر، العنکور اور الطاش علاقوں پر کنٹرول حاصل کرنا اور داعش کو ان علاقوں میں داخل ہونے سے روکنا ہے- انھوں نے اسی طرح سیکورٹی فورسز کی دہشت گردوں کے خلاف کارروائیوں میں شرکت کے لیے قبائلی رضاکاروں کو فوجی تربیت دینے کے عمل کو تیز کرنے پر زور دیا-
ایک اور رپورٹ کے مطابق عراق کی کردستان ڈیموکریٹک پارٹی کے شعبہ اطلاعات و نشریات کے انچارج سعید مموزینی نے کہا ہے کہ موصل شہر میں نامعلوم افراد نے کھانے میں زہر ملا کر داعش کے بیس دہشت گردوں کو ہلاک کر دیا ہے- ہلاک ہونے والوں میں داعش کا ایک سرغنہ ابو زیدان بھی شامل ہے-