پاکستان میں 10 دہشت گردوں کی سزائے موت کی توثیق
Apr ۰۲, ۲۰۱۸ ۱۹:۳۱ Asia/Tehran
پاکستانی فوج کے سربرہ جنرل قمر جاوید باجوہ نے فوجی عدالتوں سے سزا پانے والے دس دہشت گردوں کی سزائے موت کی توثیق کر دی۔
اسلام آباد سے ہمارے نمائندے کے مطابق پاکستانی فوج کے سربراہ نے، جن دہشت گردوں کی سزائے موت کی تصدیق کی ہے، ان میں معروف قوال اور مداح اہلبیت امجد صابری کے قاتل بھی شامل ہیں۔
پاکستانی فوج کے ترجمان ادارے آئی ایس پی آر کے مطابق جنرل قمر جاوید باجوہ نے پانچ دہشت گردوں کی عمر قید کی سزا کی بھی توثیق کر دی۔
آئی ایس پی آر کے جاری کردہ بیان کے مطابق تمام دہشت گردوں کا تعلق کالعدم تنظیموں سے تھا اور انہوں نے مجسٹریٹ کے سامنے اعتراف جرم بھی کیا تھا جس کے بعد خصوصی فوجی عدالتوں نے انہیں موت کی سزا سنائی تھی۔
