امریکی سفیر کی پاکستانی وزارت خارجہ میں طلبی
پاکستانی دفترخارجہ نے امریکی سفیر ڈیوڈ ہیل کو طلب کرکے امریکی سفارتی اہلکار کی گاڑی کی ٹکر سے شہری کی ہلاکت پر شدید احتجاج ریکارڈ کرایا۔
پاکستان کی وزارت خارجہ کی جانب سے جاری ہونے والے بیان کے مطابق پاکستان نے امریکی سفیر ڈیوڈ ہیل کو دفترخارجہ طلب کیا اور گزشتہ روز امریکی سفارتی اہلکار کی گاڑی کی ٹکر سے شہری کے جاں بحق ہونے پر احتجاج کیا گیا۔ پاکستان میں تعینات امریکی سفیر ڈیوڈ ہیل کو سیکرٹری خارجہ تہمینہ جنجوعہ نے طلب کیا تھا۔
سیکرٹری خارجہ نے امریکی سفیر کو بتایا کہ گزشتہ روز امریکی ملٹری اتاشی نے گاڑی سے ٹکر مار کر نوجوان کو جاں بحق جب کہ اس کے ساتھی کو زخمی کردیا، پاکستان اس حوالے سے ملکی قانون اور ویانا کنونشن کے مطابق انصاف کی فراہمی کو یقینی بنائے گا۔
امریکی سفیر ڈیوڈ ہیل نے شہری کی ہلاکت اور ساتھی کے زخمی ہونے پر افسوس اور ہمدردی کا اظہار کیا اور معاملے کی تحقیقات میں پولیس کے ساتھ مکمل تعاون کی یقین دہانی کرائی۔
گزشتہ روز اسلام آباد میں تھانہ کوہسار کی حدود میں امریکی سفارتخانے کے ملٹری اتاشی جوزف کی گاڑی کی ٹکر سے موٹر سائیکل سوار نوجوان عتیق جاں بحق جبکہ اس کا کزن راحیل زخمی ہوگیا تھا۔ پولیس جوزف کو گرفتار کرکے تھانے لائی تھی لیکن ملزم خود کو گاڑی میں لاک کرکے فرار ہوگیا تھا۔
واقعے کی ویڈیو اور زخمی کا بیان سامنے آیا ہے جس کے مطابق امریکی سفارتکار نے سرخ سگنل توڑتے ہوئے نوجوان کو ٹکر ماری۔ زخمی راحیل نے بھی میڈیا سے گفتگو کرتے ہوئے بتایا کہ ہمارا اشارہ کھلا تھا، لیکن دائیں سمت سے آنے والی سفید گاڑی نے اپنا اشارہ توڑتے ہوئے ہمیں ٹکر ماری۔
واضح رہے کہ 2011ء میں امریکی قونصل خانے سے منسلک سیکیورٹی اہلکار ریمنڈ ڈیوس نے لاہور میں دن دیہاڑے دو پاکستانی نوجوانوں کو ہلاک کیا تھا جس کے بعد اسے گرفتار کر لیا گیا لیکن بعد میں امریکی حکومت کے دباو کی وجہ سے اسے رہا کردیا گیا۔
