Jan ۰۹, ۲۰۱۹ ۱۹:۱۶ Asia/Tehran
  • افغان صدر کے خصوصی ایلچی کی پاکستانی وزیر خارجہ سے ملاقات

پاکستان کے وزیر خارجہ اور افغان صدر کے خصوصی ایلچی نے تجارت اور دہشت گردی کے خلاف جنگ سمیت مختلف میدانوں میں دونوں ملکوں کے درمیان تعلقات کے فروغ پر زور دیا ہے۔

 اسلام آباد میں افغانستان کے صدر کے خصوصی ایلچی عمر داؤد زئی سے بات چیت کرتے ہوئے پاکستان کے وزیر خارجہ شاہ محمود قریشی نے کہا ہے کہ ان کا ملک خطے میں قیام امن کے حوالے سے اپنی  ذمہ داریوں کو پوری طرح محسوس کرتا ہے۔

انہوں نے کہا کہ پاکستان، افغانستان میں امن و استحکام کا خواہاں ہے  اور وہ خطے کی اقتصادی رونق کو ضروری سمجھتا ہے۔
 شاہ محمود قریشی نے افغان صدر کے خصوصی ایلچی کو یقین دلایا کہ ان ملک کی حکومت، افغانستان میں جنگ کے خاتمے اور افغان عوام کی مدد کے لیے جو بھی ممکن ہوا انجام دے گی۔
 افغان صدر کے خصوصی ایلچی عمرداؤد زئی نے اس موقع اپنے ملک میں قیام امن کے حوالے سے پاکستانی وزیر اعظم عمران خان کی کوششوں کی قدر دانی کرتے ہوئے کہا کہ ان کا ملک پاکستان کے ساتھ تمام شعبوں میں تعاون کو فروغ دینے کا پختہ ارادہ رکھتا ہے۔
 قابل ذکر ہے کہ افغانستان کے صدر اشرف غنی کے خصوصی ایلچی اور افغانستان کی اعلی امن کونسل کے سربراہ عمرداؤد زئی منگل کے روز پاکستان کے دارالحکومت اسلام آباد پہنچے تھے۔

ٹیگس

کمنٹس