• ایران کے بعد ارجنٹینا کا بھی اسرائیل سے میچ کھیلنے سے انکار

اسلامی جمہوریہ ایران کے کھلاڑیوں نے اسرائیل کی غاصبانہ کارروائیوں اور فلسطینیوں سے اظہار یکجہتی کے لئے کئی مرتبہ اسرائیلی کھلاڑیوں کے ساتھ میچ کھیلنے سے انکار کیا تھا جس کے بعد اب ارجنٹینا نے بھی اسرائیل سے میچ کھیلنے سے انکار کیا ہے۔

فلسطینیوں سے اظہار یکجہتی کرتے ہوئے ارجنٹینا نے اسرائیل سے فٹبال میچ منسوخ کردیا ہے، پری ورلڈ کپ میچ ہفتے کو مقبوضہ بیت المقدس میں ہونا تھا۔

اسرائیلی اخبار کے مطابق یہ فیصلہ ارجنٹینا کی فٹبال ایسوسی ایشن نے کیا۔ جس کے بعد اسرائیلی وزیر اعظم نیتن یاہو نے ارجنٹینا کے صدر کو فون کرکے اس معاملے میں مدد کی اپیل بھی کی۔

اس سے قبل 70 فلسطینی بچوں کےایک گروپ نے ارجنٹینا کے فٹبالر لیونل میسی کو ایک خط لکھا تھا، جس میں بچوں نے اسرائیل کے خلاف دوستانہ میچ میں شرکت نہ کرنے کی درخواست کی تھی۔

میچ مقبوضہ بیت المقدس کے جنوب میں ٹیڈی اسٹیڈیم میں کھیلا جاناتھا جو 70 سال پہلے عرب اسرائیل جنگ میں تباہ ہو گیا تھا۔

واضح رہے کہ اس سے قبل کئی مرتبہ ایرانی کھلاڑیوں نے عالمی مقابلوں میں اسرائیل کے کھلاڑیوں سے میچ کھیلنے سے واضح طور پر انکار کیا تھا۔

Jun ۰۶, ۲۰۱۸ ۰۹:۳۹ Asia/Tehran
کمنٹس