• ایران کے ساتھ مفاہمت میں مشرق وسطی کو فائدہ

فیڈریکا موگرینی نے کہا کہ مشرق وسطی کی ابتر صورتحال اور دنیا میں موجود خطرات کو دیکھتے ہوئے ایران جوہری معاہدے کے تحفظ اور اس پر من و عن عمل کرنے کی اشد ضرورت ہے۔

 یورپی یونین کی خارجہ پالیسی کی سربراہ فیڈریکا موگرینی نے یورپی پارلیمنٹ میں ایران اور عالمی قوتوں کے درمیان طے پانے والے جوہری معاہدے کا دفاع کرتے ہوئے اس بات پر زور دیا ہے کہ ایران کے ساتھ مفاہمت سے مشرق وسطی کے خطے کے لئے فائدہ ہوگا.

فیڈریکا موگرینی نے یورپی پارلیمنٹ کے اراکین کی موجودگی میں خطاب کرتے ہوئے کہا کہ مجھے یقین ہے کہ امریکہ جوہری معاہدے کے حوالے سے اپنے وعدوں پر قائم رہے گا اور امریکی وزیرخارجہ نے بھی اس بات کی یقین دہانی کرائی ہے.

خاتون یورپی رہنما کا کہنا تھا کہ بین الاقوامی جوہری توانائی ادارے نے سینکڑوں معائنہ کرنے کے بعد اپنی 9 رپورٹوں میں اس بات کی تصدیق کی ہے کہ ایران اپنے وعدوں پر قائم ہے اور اس کے علاوہ یورپی ممالک نے بھی کسی تشویش کا اظہار نہیں کیا.

انہوں نے کہا کہ سفارتکاری مسائل کو پُرامن طریقے سے حل کرنے کا بہترین ذریعہ ہے لہذا ایران کے ساتھ طے پانے والے معاہدے نے خطے میں نئے جوہری پھیلاؤ کے خدشات کو دور کردیا.

ایران کے ساتھ پُرامن جوہری ٹیکنالوجی کے شعبے میں مشترکہ تعاون کی اہمیت کا ذکر کرتے ہوئے فیڈریکا موگرینی نے کہا کہ اس عمل سے ایران جوہری معاہدے کے بہتر نفاذ کے لئے مدد ملے گی.

 

Dec ۱۳, ۲۰۱۷ ۱۱:۵۹ Asia/Tehran
کمنٹس