امریکی سینیٹ میں سعودی عرب کے خلاف دو قرار دادیں منظور
Dec ۱۴, ۲۰۱۸ ۱۴:۲۶ Asia/Tehran
امریکی سینیٹ نے دو قراردادوں کے ذریعے یمن کے خلاف سعودی جنگ کی حمایت بند کرنے اور سعودی ولی عہد کو مخالف صحافی کے قتل کا ذمہ دار ٹھہرانے کی منظوری دے دی ہے۔
آزاد امریکی سینیٹر برنی سینڈرز اور ری پبلکن سینیٹر مائک لی کی پیش کردہ قرارداد کے حق میں چھپن جبکہ مخالفت میں اکتالیس ووٹ پڑے۔ اس قرارداد میں جنگ یمن میں سعودی عرب کی حمایت بند کرنے کا مطالبہ کیا گیا۔
یہ قرارداد ایسے وقت میں منظور کی گئی ہے جب امریکی صدر ٹرمپ نے پہلے ہی سعودی عرب کی حمایت بند کرنے سے انکار کر دیا۔
دوسری جانب ری پبلکن سینیٹر باب کورکر نے ایک علیحدہ قرارداد میں بن سلمان کو مخالف صحافی جمال خاشقجی کے قتل کا ملزم ٹھہرانے کا مطالبہ کیا۔ یہ قرارداد بھی کثرت رائے سے منظور کر لی گئی۔
جمال خاشقجی کو گزشتہ دنوں ترکی کے شہر استنبول میں قائم سعودی قونصل میں قتل کر دیا گیا تھا۔