روس کی نظر میں دیگر ملکوں پر امریکی دباؤ کی وجہ
Apr ۱۴, ۲۰۱۹ ۲۱:۱۴ Asia/Tehran
روس کے وزیر خارجہ نے کہا ہے کہ دنیا میں گھٹتے ہوئے امریکی اثرورسوخ کی بنا پر واشنگٹن دیگر ملکوں پر دباؤ ڈال رہا ہے۔
روس کی داخلہ اور خارجہ پالیسی کے بارے میں منعقدہ اجلاس سے خطاب کرتے ہوئے سرگئی لاوروف نے کہا ہے کہ امریکی حکام دنیا کے آزاد ملکوں میں کھلی مداخلت کر رہے ہیں۔
انھوں نے کہا کہ امریکہ وینیزویلا کی قانونی حکومت گرانے کی کوشش کر رہا ہے جبکہ وہ اس ملک کے خلاف فوجی کارروائی کے بھی درپے رہا ہے۔
امریکہ اور اس کے اتحادی ممالک وینیزویلا کے امریکہ مخالف صدر نکولس مادورو کی حکومت کا تختہ الٹنے کے لیے مخالف رہنما خوان گوآئیدو کی کھل کر حمایت کر رہے ہیں۔
امریکہ نے حکومت وینیزویلا پر دباؤ ڈالنے کی غرض سے کراکاس کے خلاف پابندیاں بھی عائد کردی ہیں جبکہ بجلی کے قومی نیٹ ورک پر سائبر حملے کر کے صورتحال کو اپنے مفاد موڑنے کی کوشش کی ہے۔