امریکہ کا پاکستان سے ڈومور کا مطالبہ
امریکہ نے پاکستان سے ایک بارپھرڈومور کا مطالبہ کرتے ہوئے کہا ہے کہ پاکستان مذہبی آزادی کیلئے مزید اقدامات کرے۔
امریکا کے وزیر خارجہ مائیک پومپیو نے مذہبی آزادی سے متعلق عالمی رپورٹ جاری کرتے ہوئے حکومت پاکستان سے مطالبہ کیا کہ ملک میں مذہبی آزادی کے سلسلے میں مزید اقدامات کیے جائیں اور اس معاملے پر تحفظات دور کرنے کے لیے مندوب مقرر کیا جائے۔
امریکی وزیر خارجہ کا کہنا تھا کہ مذہبی گستاخی کے غلط استعمال کو روکا جانا چاہیے، 40 سے زائد افراد کو اس جرم میں عمر قید یا سزائے موت کا سامنا ہے۔
انہوں نے کہا کہ امریکا اس بات پر زور دیتا رہے گا کہ ان افراد کو رہا کیا جائے اور مذہبی آزادی سے متعلق تحفظات دور کرنے کے لیے مندوب کا تقرر کیا جائے۔
پاکستان کے عوام امریکہ کے اس قسم کے بیانات کو پاکستان کے داخلی امور میں بے جا مداخلت قرار دیتے ہیں اور پاکستان کی سیاسی اور مذہبی جماعتوں نے بارہا حکومت سے مطالبہ کیا ہے کہ امریکہ کو پاکستان کے داخلی امور میں مداخلت کی اجازت نہ دے۔
