SAHAR

یورپی پارلیمان نے برطانیہ کےیورپی یونین سے الگ ہونے یا نہ ہونے سے متعلق مقررہ اکتیس اکتوبر کی تاریخ میں مزید توسیع کی مشروط منظوری دے دی ہے

یورپی پارلیمان نے اپنے اجلاس میں اکتیس اکتوبر تک برطانیہ کی یورپی یونین سے علیحدگی کی مدت میں توسیع کی منظوری اس شرط پر دے دی ہے کہ برطانیہ اس سلسلے میں درخواست کرے - یورپی پارلیمان نے اپنے اجلاس میں ایک قرارداد بھاری اکثریت سے منظور کرلی جس میں کہا گیا ہے کہ برطانیہ کے یورپی یونین سے الگ ہونے کی مدت میں مشروط طور پر توسیع کی جاتی ہے - یورپی پارلیمان کے پانچ سوچوالیس ارکان نے قرارداد کے حق میں جبکہ ایک سوچھبیس نے قرارداد کی مخالفت میں ووٹ دیا - اس قرارداد میں یہ شرط بھی عائد کی گئی ہے کہ برطانیہ سمجھوتے کے بغیر یورپی یونین سے الگ نہیں ہوگا اور نہ ہی اس سلسلے میں برطانیہ میں کوئی ریفرنڈم کرایا جائےگا - یورپی پارلیمان کے اجلاس سے خطاب کے دوران چئیرمین یان کلوڈ یانکر نے کہا کہ یورپی پالیمان کی جانب سے بریگزیٹ کی مدت میں توسیع کی منظوری کے بعد بھی برطانیہ کسی ڈیل کے بغیر ہی یورپی یونین سے الگ ہوسکتا ہے - برطانوی وزیراعظم جانسن یہ دعوی کرچکے ہیں کہ وہ اکتیس اکتوبر تک ہر صورت میں ڈیل یا بغیر ڈیل کے یورپی یونین سے الگ ہوجائیں گے جبکہ برطانیہ میں اپوزیشن جماعتوں کی جانب سے وزیراعظم جانسن پر یہ دباؤ ڈالا جا رہا ہے کہ وہ یورپی یونین سے بریگزیٹ کی تاریخ میں مزید توسیع کی درخواست کریں - بریگزیٹ کے معاملے پر برطانیہ اور یورپی یونین کے درمیان اگلے ماہ مذاکرات کا ایک اور دور ہوگا جس میں برطانیہ کے یورپی یونین سے اکتیس اکتوبر تک الگ ہونے یا اس تاریخ میں توسیع کے معاملے پر بات ہوگی -