ہندوستان، ایک روز میں ایک ہزار افراد کورونا سے ہلاک
Aug ۱۰, ۲۰۲۰ ۱۲:۴۴ Asia/Tehran
ہندوستان میں کورونا کی وبا کے بڑھتے خطرے کے درمیان اس بیماری سے ٹھیک ہونے والوں کی تعداد میں بھی اضافہ ہو رہا ہے ۔
ہندوستانی میڈیا نے صحت و خاندانی بہبود کی ترقی کی وزارت کی جانب سے آج پیر کو رپورٹ دی ہے کہ پچھلے 24 گھنٹوں میں کورونا میں مزید 62 ہزار 64 افراد مبتلا ہوئے جس سے کل مبتلا افراد کی تعداد بڑھ کر 22 لاکھ 15 ہزار 74 ہو گئی ہے۔
اسی مدت میں مزید ایک ہزار 7 لوگوں کی موت ہونے سے ہلاک شدگان کی تعداد 44 ہزار 386 ہو گئی۔ تاہم ہندوستان میں کورونا سے شفایاب ہونے کا سلسلہ بھی جاری ہے اور گزشتہ 24 گھنٹوں کے دوران 54 ہزار859 لوگ انفیکشن سے ٹھیک ہوئے ہیں جس سے صحت یاب ہونے والوں کی کل تعداد 15 لاکھ 35 ہزار743 ہو گئی ہے۔
کورونا سے سب سے زیادہ متاثر بدستور ریاست مہاراشٹر ہے جہاں مزید 390 لوگوں کی موت ہونے سے ہلاک شدگان کی تعداد 17 ہزار757 ہو گئی۔