فلسطینی گروہوں نے لبنان کی تحریک فتح کے سیکورٹی سربراہ کے قتل کی مذمت کی ہے-

فلسطین کے انفارمیشن سینٹر کی رپورٹ کے مطابق لبنان میں تحریک حماس کے نمائندے احمد عبدالھادی نے لبنان کے "المیہ و میہ" کیمپ میں تحریک فتح کے رہنما فتحی زیدان کے قتل کی مذمت کرتے ہوئے کہا ہے کہ اس قتل کا مقصد صیہونی حکومت کے اہداف پورا کرنا ہے-

فلسطین کی تحریک جہاد اسلامی کے اہم رہنما ابوعماد الرفاعی نے بھی لبنان میں فتحی زیدان کے قتل پر ردعمل ظاہر کرتے ہوئے کہا ہے کہ یہ قتل ، فلسطینی پناہ گزینوں کے کیمپوں کے امن و استحکام کو درہم برہم کرنا ، ان میں فتنہ و فساد برپا کرنا اور فلسطینی مہاجرین کی وطن واپسی کے مسئلے کو سرے سے ختم کرنا ہے-

ابوعماد الرفاعی نے دشمنوں کی سازشوں کو ناکام بنانے کے لئے فلسطینیوں کے درمیان اتحاد پر تاکید کی ہے-

نامعلوم افراد نے جنوبی لبنان کے شہر صیدا میں "المیہ و میہ" مہاجر کیمپ میں ایک کار بم دھماکا کرکے تحریک فتح کے اہم رہنما فتحی زیدان کو شہید کر دیا-