ایٹمی توانائی کی عالمی ایجنسی کے سربراہ نے ایران کے ساتھ ایٹمی سمجھوتے کو ایک تاریخی موقع قرار دیا ہے

ارنا کی رپورٹ کے مطابق ایٹمی توانائی کی عالمی ایجنسی کے سربراہ یوکیا آمانو نے منگل کو بورڈ آف گورنرز کے اجلاس میں ایران کے ساتھ ایٹمی سمجھوتے کے سلسلے میں حالیہ تنقیدوں کو مسترد کرتے ہوئے کہا ہے کہ ایران اور گروپ پانچ جمع ایک کے درمیان ایٹمی سمجھوتے میں جو طریقہ کار معین کئے گئے ہیں وہ، آئی اے ای اے کے سیکورٹی اور تکنیکی معیارات کے ہرگز منافی نہیں ہیں- یوکیا آمانو نے مزید کہا کہ ایٹمی سمجھوتے کا متن خفیہ ہے اور وہ اس کی تفصیلات فاش نہیں کر سکتے لیکن آئی اے ای اے کے سربراہ نے یقین دلایا کہ ایران کے ساتھ جو سمجھوتہ ہوا ہے وہ تکنیکی لحاظ سے مضبوط اور آئی اے ای اے کی سیف گارڈ سرگرمیوں کے ساتھ ہم آہنگی رکھتا ہے- ایٹمی توانائی کی عالمی ایجنسی کے سربراہ یوکیا آمانو نے ایک بیان میں کہا کہ چودہ جولائی کو انھوں نے اور ایران کی ایٹمی توانائی کے ادارے کے سربراہ علی اکبر صالحی نے ایسے روڈ میپ پر دستخط کئے ہیں جس سے ایران کے ایٹمی پروگرام کی سابقہ اور موجودہ سرگرمیاں واضح ہو جائیں گی- یوکیا آمانو کے بقول اس روڈ میپ کا اصلی مقصد ایران اور آئی اے ای اے کے درمیان تعاون میں تیزی لانا اور اسے مضبوط بنانا ہے اور سنہ دوہزار پندرہ تک باقی تمام مسائل حل ہو جائیں گے- اسلامی جمہوریہ ایران نے پندرہ اگست کو آئی اے ای اے کے سامنے کچھ دستاویزات کے ساتھ ایک جامع وضاحت پیش کی ہے جس کا جائزہ لیا جا رہا ہے-