ہندوستان کے وزیراعظم نریندرمودی نے دہشت گردی کے پھیلنے پر گہری تشویش کا اظہار کرتے ہوئے کہا ہے کہ یہ علاقے کی سلامتی کے لئے مشترکہ خطرہ ہے-

لائوس میں آسیان کے سربراہی اجلاس میں خطاب کرتے ہوئے ہندوستانی وزیرا‏عظم نے کہا کہ دہشت گردی کا مقابلہ کرنے کے لئے آسیان کے رکن ملکوں کو ایک مشترکہ حکمت عملی تیار کرنی چاہئے - انہوں نے اپنے خطاب میں کہا کہ بڑھتے ہوئے چیلنجوں کے پیش نظر آپسی رشتوں میں سیاسی تعاون بہت ہی ضروری ہے - انہوں نے سائبر سیکورٹی پربھی اپنے خیالات کا اظہار کرتے ہوئے کہاکہ ہم سائبر سیکورٹی ، انتہا پسندی کے خاتمے اور دہشت گردی کا مقابلہ کرنے کے لئے ٹھوس قدم اٹھانا چاہتے ہیں -

انہوں نے کہا کہ آسیان ہندوستان کی خارجہ پالیسی میں خاص مقام رکھتاہے- ہندوستانی وزیراعظم کا کہنا تھا کہ ہندوستان آسیان کے سبھی ملکوں کے ساتھ اپنے تجارتی اور اقتصادی تعاون کو فروغ دینا چاہتاہے - انہوں نے آسیان کے اجلاس کی میزبانی کرنے پر لائوس کی حکومت کا شکریہ ادا کیا - جواب میں لائوس کے وزیراعظم نے بھی آسیان میں ہندوستان کے اہم رول پر شکریہ ادا کیا -