افغانستان کے وزیر صحت نے اعلان کیا ہے کہ ان کے ملک میں پانچ سال سے کم عمر کے چالیس فیصد بچے سالم غذا سے محروم ہیں-

کابل سے ہمارے نامہ نگار کی رپورٹ کے مطابق فیروزالدین فیروز نے کابل میں ایک پروگرام میں کہا کہ افغانستان میں بچوں کے لئے سالم غذا کی قلت، ان کا قد کم رہ جانے کا سبب بنے گی- انہوں نے کہا کہ نصف سے زیادہ بچے ویٹامین اے کی کمی سے دوچار ہیں اور اس ویٹامین کی کمی  " شب کوری " یا رات میں دکھائی نہ دینے کا سبب بنتی ہے- 

افغانستان کے وزیر صحت نے کہا کہ تقریبا اکیاسی فیصد بچوں کو روزمرہ کی غذا کے ذریعے کافی مقدار میں ویٹامین ڈی نہیں پہنچتی ہے اور یہی مسئلہ ان کی ہڈیوں کے کمزور ہونے اور اوسٹیوپروسس (ہڈیوں کے کھوکھلا ہونے کے مرض ) کا سبب بنتا ہے- فیروزالدین فیروز نے مزید کہا کہ پانچ سال سے کم عمر کے تقریبا چوالیس فیصد بچے اور افغان مائیں زچگی کے دوران خون کی کمی میں مبتلا ہیں اور یہ کمی آئرن کی کمی کی وجہ سے ہے-