باخبر ذرائع نے صیہونی حکومت کی جانب سے بیت المقدس میں نئی پابندیاں عائد کئے جانے کی خبر دی ہے

موصولہ رپورٹ کے مطابق صیہونی فوج نے جمعرات کی رات ایک بیان میں کہا ہے کہ نماز جمعہ ادا کرنے کے لئے مسجد الاقصی میں فلسطینی نمازیوں کے داخل ہونے کے سلسلے میں عائد نئی پابندیوں کے مطابق صرف چالیس سال سے زیادہ عمر کے مردوں اور خواتین کو ہی مسجد الاقصی میں داخل ہونے کی اجازت ہوگی۔

اس بیان میں آیا ہے کہ جمعہ کی صبح بیت المقدس کے اطراف کے علاقوں میں بڑی تعداد میں صیہونی پولیس اہلکار تعینات کر دیئے جائیں گے- یہ فیصلہ ایسے عالم میں کیا گیا ہے کہ بیت المقدس گذشتہ ہفتے سے ہی صیہونیوں کے اشتعال انگیز اقدامات اور پے در پے حملوں کی زد پر ہے اور صیہونی کابینہ نے فلسطینی نوجوانوں پر براہ راست فائرنگ کرنے کی اجازت دے دی ہے- گذشتہ ہفتے کے شروع میں ہی مسجد الاقصی پر صیہونیوں کے حملوں میں سو سے زیادہ فلسطینی زخمی ہوئے ہیں جبکہ متعدد کو گرفتار کر لیا گیا ہے-