اسلامی جمہوریہ ایران کے وزیر داخلہ عبدالرضا رحمانی فضلی نے کہا ہے کہ مستقبل قریب میں ایران اور افغانستان جامع معاہدے پر دستخط کریں گے۔

عبدالرضا رحمانی فضلی نے بدھ کے دن ایران اور افغانستان کے باہمی تعاون کے پانچویں مشترکہ اجلاس کی اختتامی تقریب میں کہا کہ ایران اور افغانستان کے درمیان جامع معاہدے پر دستخط ہونے کے بعد مختلف شعبوں میں دونوں ممالک کے باہمی تعاون میں توسیع آئے گی۔

عبدالرضا رحمانی فضلی نے کہا کہ ایران اور افغانستان کے جامع معاہدے پر دستخط ہونے کی راہ میں کوئی رکاوٹ حائل نہیں ہے ۔ایرانی وزیرداخلہ کا کہنا تھا کہ ایران کے ساتھ افغانستان کا تعلق اسٹریٹیجک ہے اوران دو ہمسایہ، برادراور مسلمان ممالک کے درمیان تاریخی اور ثقافتی مشترکات پائے جاتے ہیں اور دونوں ممالک دوطرفہ تعاون میں توسیع کے خواہاں ہیں۔