SAHAR

وزیرخارجہ ڈاکٹر محمد جواد ظریف نے ناروے کے دارالحکومت اوسلو میں نارویجین انسٹی ٹیوٹ آف انٹرنیشنل افیئر کے اجلاس میں اپنے خطاب کے دوران خلیج فارس کے مستقبل اور جنگ کے خطرے کے امکان کے بارے میں کہا کہ ایران خلیج فارس میں جنگ میں پہل نہیں کرے گا لیکن وہ اپنا بھرپور دفاع کرے گا۔ انہوں نے کہا کہ امریکا نے اپنی پابندیوں کے ذریعے ایرانی عوام کو نشانہ بنایا ہے جو ایک طرح کی دہشت گردی ہے۔ ان کا کہنا تھا کہ ملکوں کو اس بات کی اجازت نہیں دینی چاہئے کہ امریکا ان سے داداگیری سے پیش آئے انہوں نے کہا کہ اسلامی جمہوریہ ایران کبھی بھی دھونس و دھمکی سے مرعوب نہیں ہوگا۔ ایرانی وزیرخارجہ نے اس بات کا ذکر کرتے ہوئے کہ ایران ایک ہزار پانچ سو میل ساحل کے ساتھ خلیج فارس کا سب سے بڑا ملک ہے کہا کہ آبنائے ہرمزکی سلامتی ایران کے بغیر ممکن نہیں ہے اور کوئی دوسرا ملک بھی اس علاقے میں بدامنی نہیں پھیلا سکتا۔ وزیرخارجہ نے کہا کہ ایران سبھی ملکوں کے ساتھ تعاون اور افہام و تفہیم کے لئے تیار ہے۔ وزیرخارجہ ڈاکٹر جواد ظریف نے ناروے سے پہلے فنلینڈ اور سوئیڈن کا بھی دورہ کیا ہے- وہ تین یورپی ملکوں کے دورے کے پہلے مرحلے میں اتوار فنلینڈ کے دارالحکومت ہلسنکی پہنچے تھے۔