یمنی فوج اور عوامی رضاکار فورس کے جوانوں نے جیزان کے علاقے میں سعودی عرب کے فوجی ٹھکانوں پر گولہ باری کی ہے۔

 المسیرہ ٹی وی کے مطابق، یمنی فوج اور عوامی رضاکار فورس کے توپ خانے اور میزائل یونٹ نے ایک کامیاب کارروائی کے دوران، جیزان کے علاقے میں واقع الفریضہ اور برج الخشل میں سعودی فوجی ٹھکانوں پر حملے کرکے انہیں بھاری نقصان پہنچایا ہے۔یمنی فوج نے جنوبی سعودی عرب کے سرحدی شہر نجران کے الشرفہ نامی علاقے میں بھی سعودی فوج کے دو ٹینکوں کو  تباہ کردیا ہے۔دوسری جانب سعودی عرب کے لڑاکا طیاروں نے صوبہ صعدہ کے مختلف علاقوں میں آٹھ بار حملے کیے ہیں اور رہائشی علاقوں پر بمباری کی ہے۔یمنی ذرائع کے مطابق سعودی عرب کی وحشیانہ بمباری میں کم سے کم تین عام شہری شہید اور چھے دیگر زخمی ہوئے ہیں۔