پاکستان کی متحدہ قومی موومنٹ کے ارکان نے صوبائی اور قومی اسمبلیوں کی نشستوں سے مستعفی ہونے کا اعلان کر دیا۔

پاکستان کے ذرائع ابلاغ کے مطابق متحدہ قومی موومنٹ کے سربراہ کے حکم پر اس پارٹی کے ارکان نے صوبائی اور قومی اسمبلی اور سینیٹ سے مستعفی ہونے کا اعلان کر دیا۔

 ایم کیو ایم کے عہدے داروں نے دعوی کیا ہے کہ پاکستان کی حکومت ان کے مطالبات پر کوئی توجہ نہیں دے رہی ہے اس لئے اجتماعی طور پر مستعفی ہونے کے سوا اور کوئی راستہ باقی نہیں رہا ہے۔

 رپورٹوں کے مطابق یہ فیصلہ الطاف حسین کی قیادت میں ایم کیو ایم کی مرکزی کمیٹی کے اجلاس میں لیا گیا۔

مبصرین کا خیال ہے کہ ایم کیوایم، یہ فیصلہ کر کے مرکزی حکومت پر دباؤ بڑھانا چاہتی ہے۔

 واضح رہے کہ متحدہ قومی موومنٹ کے عہدے داروں نے کراچی میں فوجی آپریشن کو اپنی پارٹی کے خلاف کارروائی قرار دیا ہے۔

یاد رہے کہ الطاف حسین نے کچھ دن قبل کراچی میں امن کی بحالی کے لئے بیرونی طاقتوں کی مداخلت کی ضرورت پر زور دیا تھا، جس کے بعد ان کی پارٹی اور ارکان پر دباؤ میں اضافہ ہو گیا۔