پاکستان کے الیکشن ٹربیونل نے قومی اسمبلی کے ایک اورحلقے میں انتخابات کو کالعدم قرار دے دیا ہے

ہمارے نمائندے کے مطابق پاکستان میں انتخابی عذرداریوں کی سماعت کرنے والی ایک مقامی عدالت نے حلقہ این اے ایک سو چون میں مبینہ دھاندلی کیس کا فیصلہ سناتے ہوئے دوبارہ پولنگ کرانے کا حکم دے دیا ہے۔

الیکشن کمیشن نے دوہزارتیرہ کے عام انتخابات میں مذکورہ حلقے سے تحریک انصاف کے امیدوارجہانگرین ترین کے مقابلے میں آزاد امیدوار صدیق خان بلوچ کو کامیاب قرار دیا تھا جنہوں نے بعد میں مسلم لیگ نون میں شمولیت اختیار کرلی تھی۔

جہانگیر ترین نے صدیق خان بلوچ کی کامیابی کو الیکشن ٹریبونل میں چیلنج کیا تھا۔انہوں نے اپنی پٹیشن میں صدیق خان بلوچ پر جعلی ڈگری اور پولنگ کے دوران دھاندلی کا الزام لگایا تھا۔

صدیق بلوچ پاکستان کی حکمراں جماعت کے ایسے تیسرے امیدوار ہیں جنہیں انتخابی عذرداریوں کی سماعت کرنے والی عدالتوں کی جانب سے اسمبلی کی رکنیت سے ہاتھ دھونا پڑا ہے۔
 اس سے پہلے پاکستان میں انتخابی عذرداریوں کی سماعت کرنے والے عدالتوں نے قومی اسمبلی کے اسپیکر ایاز صادق اور وزیر ریلوے خواجہ سعد رفیق کے خلاف فیصلہ دیتے ہوئے دوبارہ انتخابات کرانے کا حکم دیا تھا۔