فیفا ورلڈ کپ جاپان اورمیکسیکو ورلڈ کپ سے آوٹ
فیفا ورلڈ کپ میں برازیل نے میکسیکو کو 0-2 سے جبکہ بیلجیئم نے جاپان کو3-2 سے ہرا کر کوارٹر فائنل میں رسائی حاصل کرلی۔
روس میں جاری میگا ایونٹ کے میچ میں برازیل اور میکسیکو ٹیمیں پہلے ہاف میں کوئی گول کرنے میں کامیاب نہ ہو سکیں، دوسرے ہاف کے آغاز میں ہی نیمار نے 51 ویں منٹ میں گول داغتے ہوئے برازیل کو برتری دلا دی۔
88 ویں منٹ میں رابرٹو فرمینو نے دوسرا گول کرتے ہوئے برازیل کی فتح پر مہر تصدیق ثبت کردی۔ میکسیکن گول کیپر گوئلرمو اوشو نے کئی یقینی گول بچائے تاہم وہ ٹیم کو شکست سے نہ بچا پائے۔
فیفا ورلڈ کپ کے دوسرے سنسنی خیز مقابلے میں جاپان کی ٹیم نے عمدہ کارکردگی کا مظاہرہ کرتے ہوئے دو گول کی برتری کے باوجود یہ میچ 3-2 سے ہار گئی۔ بیلجیئم نے آخری منٹ میں تیسرا گول کرکے فتح حاصل کی۔
میکسیکو کی ٹیم کو ساتویں مرتبہ راﺅنڈ 16 سے اخراج کا سامنا کرنا پڑا ہے۔ کوارٹر فائنل میں برازیل کا مقابلہ بیلجیم سے ہوگا.
