امریکی وزارت خارجہ کےترجمان جان کربی نے کہا ہے کہ واشنگٹن دمشق کے سلسلے میں اپنی پالیسی تبدیل نہیں کرے گا۔

تسنیم خبر رساں ایجنسی کی رپورٹ کے مطابق جان کربی نے جمعے کے دن شامی فوجیوں پر امریکہ کے فضائی حملے پر مبنی دسیوں امریکی سفارت کاروں کے مطالبے پر رد عمل ظاہر کرتے ہوئے دعوی کیا کہ امریکہ اب بھی شام کے بحران کے سیاسی حل کا قائل ہے۔

جان کربی نے مزید کہا کہ امریکی حکومت کی ساری توجہ اس جانب ہے کہ باراک اوباما کے عہد صدارت کےاختتام تک شام کے بحران کا پرامن حل تلاش کر لیا جائے۔

واضح رہے کہ اخبار وال اسٹریٹ جرنل اور نیویارک ٹائمز کی رپورٹوں کے مطابق امریکی وزارت خارجہ کے پچاس سے زیادہ سفارت کاروں نے شام سے متعلق وائٹ ہاؤس کے موقف پر تنقید کرتے ہوئے شام کی فوج پر حملے کا مطالبہ کیا تھا۔