امریکی وزارت دفاع پینٹاگون کے قریب فائرنگ، لاک ڈاؤن نافذ
امریکی وزارت دفاع پینٹاگون میں میٹرو اسٹیشن کے قریب فائرنگ کے واقعے کے بعد لاک ڈاؤن نافذ کردیا گیا جبکہ متعدد افراد زخمی ہوگئے۔
خبرایجنسی اے پی کی رپورٹ کے مطابق امریکا میں منگل کی صبح پینٹاگون کے داخلی راستے پر فائرنگ ہوئی، جس کے نتیجے میں متعدد افراد زخمی ہوگئے۔
رپورٹ میں بتایا گیا کہ فائرنگ کے بعد امریکی فوجی ہیڈکوارٹرز میں لاک ڈاؤن نافذ کردیا گیا۔
مقمی فائر ڈپارٹمنٹ نے رپورٹ میں بتایا کہ متعدد افراد زخمی ہیں لیکن فوری طور پر واضح نہیں ہوسکا کہ کیا وہ گولی لگنے سے زخمی ہوئے ہیں۔
سماجی رابطے کی ویب سائٹ ٹوئٹر پر پینٹاگون فورس پروٹیکشن ایجنسی نے بتایا کہ فائرنگ کا واقعہ پینٹاگون ٹرانزٹ سینٹر سے متصل میٹرو بس اسٹیشن میں پیش آیا۔
واقعے سے متعلق مزید بتایاگیا کہ اسٹیشن پینٹاگون سے چند قدم کے فاصلے پر ہے۔
اے پی کے مطابق جائے وقوع کے قریب موجود ان کے نمائندے نے متعدد فائر کی آواز سنی، جس کے بعد وقفہ آیا اور پھر مزید ایک فائر ہوا۔
پینٹاگون کی جانب سے جاری بیان میں کہا گیا کہ پولیس کی سرگرمی کے باعث لاک ڈاؤن نافذ کردیا گیا ہے۔
پولیس کی تفتیش کے باعث میٹرو کو بھی پینٹاگون سے نہ گزرنے کا حکم دیا گیا ہے۔
