روس کے وزیر خارجہ سرگئی لاوروف نے کہا ہے کہ مغربی ممالک خود کو لاحق داعش گروہ کے سنگین خطرے کی طرف متوجہ ہو گئے ہیں-

اطلاعات کے مطابق روس کے وزیر خارجہ سرگئی لاوروف نے اتوار کے روز ایک انٹرویو میں کہا کہ مغربی ممالک اب سمجھ گئے ہیں کہ شام کے صدر بشار اسد ان کے دشمن نہیں ہیں بلکہ دہشت گرد گروہ داعش ان کے لئے اصل خطرہ شمار ہوتا ہے- انہوں نے روسی ٹی وی سے اپنے انٹرویو کے دوران کہا کہ اگرچہ بہت سے مغربی ممالک میں اب بھی اس بات کا اعتراف کرنے کی جرات نہیں ہے اور ضمنی طور پر ہی انہوں نے اس موضوع کی طرف اشارہ کیا ہے لیکن تمام مغربی ممالک اس بات کی طرف متوجہ ہو گئے ہیں کہ مشرق وسطی اور شمالی افریقہ کے لئے اصل خطرہ داعش ہے- روسی وزیر خارجہ نے کہا کہ شامی حکومت کے ساتھ تعاون کے بغیر دہشت گرد گروہ داعش کا مقابلہ کرنا ہرگز ممکن اور قابل عمل نہیں ہے- انہوں نے تاکید کے ساتھ کہا کہ شامی افواج سرزمین شام پر داعش سے مقابلے میں مؤثر ترین کردار ادا کریں گی- روسی وزیر خارجہ نے دہشت گردی سے مقابلے میں عراق اور شام کی حکومتوں کے ساتھ مزید تعاون کے لئے اپنے ملک کی آمادگی کا اظہار کیا-