ہندوستان، لداخ میں فوجی کارواں حادثے کا شکار، 7 فوجی ہلاک
ہندوستان کے زیر انتظام کشمیر کے لداخ علاقے میں ہندوستانی فوج کی گاڑی دریائے شیوک کے قریب سڑک سے پھسل کر بھاری پتھروں سے ٹکراتے ہوئے دریا میں جاگری جس کے نتیجے میں 7 فوجی اہلکار ہلاک ہوگئے۔
این ڈی ٹی وی کی رپورٹ کے مطابق ہندوستانی فوج کے ترجمان نے کہا کہ 26 اہلکاروں کا قافلہ پرتاپور میں ٹرانزٹ کیمپ سے سب سیکٹر حنیف جا رہا تھا۔
انہوں نے کہا کہ تھوئس سے تقریباً 25 کلومیٹر دو مقامی وقت کے مطابق صبح 9 بجے گاڑی سڑک سے پھسل کر دریائے شیوک میں 50 سے 60 فٹ گہرائی میں جاگری، جس سے گاڑی میں موجود تمام اہلکار زخمی ہوئے۔
ان کا کہنا تھا کہ جائے وقوع پر تیزی سے ریسکیو آپریشن کیا گیا اور تمام اہلکاروں کو پرتاپور میں فیلڈ ہسپتال منتقل کیا گیا۔
ترجمان نے کہا کہ ہسپتال میں اب تک 7 اہلکار زخموں کی تاب نہ لاتے ہوئے چل بسے ہیں جبکہ دیگر کو بھی گہرے زخم آئے ہیں۔
انہوں نے کہا کہ اس بات کی بھرپور کوششیں کی جارہی ہیں کہ زخمیوں کو علاج معالجے کی بہترین سہولیات فراہم کی جائیں جبکہ تشویشناک حالت میں موجود اہلکاروں کو مغربی کمانڈ منتقل کرنے کے لیے بھارتی فضائیہ کو بھی معاونت کی درخواست کی جاچکی ہے۔
ہندوستانی وزیر اعظم نریندر مودی نے سڑک حادثے میں ہلاک ہونے والے جوانوں کے ورثا سے تعزیت کرتے ہوئے کہا کہ متاثرہ خاندانوں کی ہر ممکن مدد کی جائے گی۔
انہوں نے ٹوئٹ میں کہا کہ ’لداخ میں بس حادثے کا سن کر شدید تکلیف ہوئی جس میں ہم نے آرمی کے 7 بہادر جوانوں کو کھو دیا‘۔
نریندر مودی نے زخمیوں کی جلد صحتیابی کی امید کرتے ہوئے کہا کہ متاثرین کو تمام ممکنہ مدد فراہم کی جائے گی۔
