امریکی حکمرانوں نے اپنی اصلیت دکھا دی، صدر مملکت ڈاکٹر حسن روحانی
صدر ایران ڈاکٹر حسن روحانی نے کہا ہے کہ امریکی حکام نے سیلاب زدگان کی عالمی امداد میں رکاوٹیں کھڑی کر کے اپنی اصلیت دکھا دی ہے۔
کابینہ کے اجلاس سے خطاب کرتے ہوئے صدر مملکت حسن روحانی نے کہا کہ امریکی حکام نے اپنے دعوے کے برخلاف حالیہ سیلاب کے دوران ایرانی عوام کے ساتھ اپنی خباثت اور دشمنی کا ثبوت پیش کر دیا۔
صدر ایران نے کہا کہ حالیہ سیلاب اور امریکہ کے اقدامات کے پیش نظر ضرورت اس بات کی ہے کہ ایرانی عوام تمام مشکلات کے حل کے لیے اپنے پیروں پر کھڑے ہو جائیں۔
ڈاکٹر حسن روحانی نے ان تمام ملکوں کی حکومتوں کی قدردانی کی جنہوں نے حالیہ سیلاب کے دوران ایران کی حکومت اور عوام کی مدد کی اور ان کے ساتھ ہمدردی کا اظہار کیا۔
صدر ایران نے عزم ظاہر کیا کہ ایران کی حکومت عوام کے تعاون سے سیلاب کی تباہ کاریوں پر قابو پانے میں کامیاب ہو جائے گی۔
یاد رہے کہ اسلامی جمہوریہ ایران کے شمالی اور جنوب مغربی علاقے وسیع پیمانے پر سیلاب کی زد میں تھے جس کے نتیجے میں چھیتر سے زائد افراد جاں بحق ہو گئے۔
