خلیج تعاون کونسل کا بیان بیہودہ اور مخاصمانہ ہے : حزب اللہ
حزب اللہ لبنان نے خلیج فارس تعاون کونسل کے حالیہ بیان کو بیہودہ اور مخاصمانہ قراردیا ہے
حزب اللہ کے ممبران پارلیمنٹ نے خلیج فارس تعاون کونسل کے تازہ ترین بیان کا ذمہ دار سعودی عرب کوبتایا ہے - لبنان کی پارلیمنٹ میں حزب اللہ کے ارکان نے اپنے ہفتہ وار اجلاس میں کہا ہے کہ حزب اللہ کو دہشت گرد قراردینے کے تعلق سے خلیج فارس تعاون کونسل کا تازہ بیان بیہودہ اور مخاصمانہ ہے اور ہم اس کی مذمت کرتے ہیں - حزب اللہ کے ارکان پارلیمنٹ نے کہاکہ یہ بیان سعودی عرب کے کہنے پر جاری کیا گیا ہے اور اس کے نتائج کا ذمہ دار بھی سعودی عرب ہی ہوگا - واضح رہے کہ خلیج فارس تعاون کونسل نے اپنے حالیہ بیان میں حزب اللہ کو ایک دہشت گرد تنظیم قرار دیا ہے اور صیہونی نیز تکفیری دہشت گردی کے خلاف حزب اللہ کے اقدامات اور لڑائی کو خطرناک قرار دیتے ہوئے اس کی مذمت کی ہے۔ مبصرین کا کہنا ہے کہ خلیج فارس تعاون کونسل نے یہ بیان حزب اللہ پر دباؤ ڈالنے کے لئے دیا ہے جو لبنان کی سیکورٹی کے تحفظ اور صیہونی حکومت کو لبنانی سرزمین پرجارحیت سے باز رکھنے نیز شام میں دہشت گردوں کے خلاف جنگ میں اہم رول ادا کررہی ہے -