یمن کی فوج اور عوامی رضاکار فورس نے پیر کو سعودی عرب کے مشیط الخمیس ایئر بیس پر قاہر ایک میزائل سے حملہ کرکے اسے کافی نقصان پہنچایا ہے۔

ارنا نے یمنی ذرائع کے حوالے سے رپورٹ دی ہے کہ یمن کا قاہر ایک میزائل سعودی عرب کے مشیط الخمیس ایئر بیس میں اپنے نشانے پر جاکر لگا ہے ۔

یمنی فوج نے اعلان کیا ہے کہ یہ میزائل، سعودی عرب کی جانب سے جنگ بندی کی مسلسل خلاف ورزیوں اور یمنی عوام پر وحشیانہ بمباری کے جواب میں داغا گیا ہے۔

یاد رہے کہ سعودی حکومت اور اس کے اتحادیوں نے مارچ دو ہزار پندرہ سے یمن کے رہائشی علاقوں پر وحشیانہ جارحیت کا سلسلہ جاری رکھا ہوا ہے جس میں اب تک خواتین اور بچوں سمیت ہزاروں یمنی شہری شہید ہوچکے ہیں-