بیلجیئم کا نوجوان حج کی ادائیگی کیلئے سائیکل پر سعودی عرب پہنچ گیا
حج کی ادائیگی کیلئے بیلجیئم کا نوجوان ساڑھے 4 ہزار کلومیٹر سائیکل پر سفر کرکے سعودیہ پہنچ گیا
سحرنیوز/عالم اسلام:بیلجیئم سے نوجوان سائیکل پر حج کے لیے سعودی عرب پہنچ گیا۔
حج کی ادائیگی کے جذبے نے پہاڑ جیسے فاصلے مٹا دیے، بیلجیئم سے نوجوان طویل اور ہزاروں کلو میٹر پر محیط سفر طے کرکے سائیکل پر سعودی عرب پہنچا۔
رمضان کے بابرکت مہینے میں جب لوگ عبادات میں مصروف تھے تب بیلجیئم کے 26 سالہ نوجوان انس الرزقی نے ایک منفرد اور عظیم سفر کا آغاز کیا۔
سائیکل پر مکہ مکرمہ تک کا 4500 کلومیٹر طویل سفر ادائیگی حج کےلیے ادا کیا، انہوں نے آسٹریا، اٹلی، بوسنیا اور دیگر ممالک سے ہوتے ہوئے سعودی عرب کا سفر طے کیا۔
انس الرزقی نے بتایا کہ میں نے یہ سفر رمضان المبارک میں روزے کی حالت میں شروع کیا اور روزانہ تقریباً 100 کلو میٹر سائیکل چلائی۔
انس نے کہا کہ یہ ایک خواب ہے، ایک نعمت ہے، سفر کے دوران میں نے مساجد میں رات بسر کی, یہ سفر آسان نہیں تھا لیکن ایمان، جذبے اور صبر کے ساتھ ہر مشکل کو عبور کرتا گیا۔
جب انس سعودی عرب پہنچے تو حلّت عمار بارڈر پر ان کا پھولوں اور عربی قہوے سے استقبال کیا گیا، وہ حج پرمٹ کا بیج پہن کر بارڈر سکیورٹی اہلکاروں کے ساتھ دستاویزات مکمل کرتے نظر آئے۔
اس سے قبل اسپین سے گھوڑوں پر سوار 3 عازمین حج 8 ہزار کلومیٹر کی مسافت طے کرکے سعودی عرب پہنچے تھے، تینوں عازمین نے تقریباً 8 ماہ قبل سفر شروع کیا تھا۔
تینوں ہسپانوی مسلمان عبدالقادر ، عبداللہ اور طارق اسلام قبول کرنے کے 35 سال بعد اپنی دیرینہ خواہش پوری کررہے ہیں۔
