اسلام آباد کی احتساب عدالت نے توشہ خانہ گاڑیوں سے متعلق ریفرنس پر آصف زرداری کو صدارتی استثنیٰ ملنے کی درخواستیں منظور کرنے کا حکم نامہ جاری کر دیا۔

سحرنیوز/ پاکستان: احتساب عدالت کے جج ناصر جاوید نے ریفرنس پر کارروائی روکنے کا حکم نامہ جاری کرتے ہوئے کہا کہ جب تک آصف زرداری صدر ہیں ان کے خلاف کیسز کی کارروائی آگے نہیں بڑھ سکتی۔ درخواستوں میں مؤقف اختیار کیا گیا آصف زرداری صدر ہیں، کرمنل کیسز کی کارروائی جاری نہیں رہ سکتی۔

حکم نامے میں کہا گیا ہے کہ پراسیکیوشن نے درخواستوں پر اعتراض نہیں کیا اور نہ مخالفت کی گئی، آرٹیکل 248 (2) کے تحت صدر کے خلاف کیس ہو سکتا ہے اور نہ کوئی کارروائی جاری رہ سکتی ہے۔ احتساب عدالت نے کہا کہ آصف زرداری کی صدارتی استثنیٰ حاصل کرنے کی درخواستیں منظور کی جاتی ہیں۔