Aug ۰۹, ۲۰۲۰ ۱۴:۱۸ Asia/Tehran
  • ولایت سے دوری امت اسلامیہ کی مشکلات کا بنیادی سبب: انصار اللہِ یمن

یمن کی تحریک انصار اللہ کے سربراہ نے ولایت سے دوری کو امت اسلامیہ کی مشکلات کا بنیادی سبب قرار دیا ہے۔

عید غدیر کی مناسبت سے یمنی عوام کو خطاب کرتے ہوئے تحریک انصار اللہ کے سربراہ عبد الملک بدر الدین الحوثی نے کہا کہ عالم اسلام اور عالم عرب اس وقت بے پناہ مشکلات سے دوچار ہے اور بعض لوگ یہ خیال کرتے ہیں کہ ان کا راہ حل امریکہ اور اسرائیل کے ہاتھ میں ہے، مگر سبھی کو یہ جان لینا چاہئے کہ امریکہ اور اسرائیل بذات خود خطے میں پیدا ہونے والی مشکلات کی جڑ ہیں۔

تحریک انصار اللہ کے سربراہ نے کہا کہ الٰہی تعلیمات سے دوری کے سبب امت اسلامیہ کے امور میں اغیار نے مداخلت کی راہ اپنا لی ہے اور یہی مداخلت خطے کے اسلامی اور عرب ممالک میں مشکلات کا سبب بنی ہوئی ہے۔

عبد الملک بدر الدین الحوثی نے اس بات پر زور دیا کہ ولایت ہی وہ عنصر ہے جو امت اسلامیہ کے دشمنوں کو لگام دینے، امت میں پیدا ہونے والے شگاف کو پُر کرنے اور الٰہی تعلیمات کے جاری و ساری رہنے کی ضمانت ہے۔

خیال رہے کہ یمن کی تحریک انصار اللہ گزشتہ پانچ برسوں سے مغربی، یورپی اور عربی حمایت یافتہ سعودی جارحیت کا مقابلہ کر رہی ہے اور اُس نے اب تک جارح سعودی دشمن کو اپنے مقاصد کے حصول میں کامیاب نہیں ہونے دیا ہے۔

ٹیگس