اسلامی جمہوریہ ایران کے وزیر خارجہ نے شام میں مغرب کے حمایت یافتہ دہشت گردوں کے ہاتھوں ایک بارہ سالہ فلسطینی بچے کا سر بے دردی کے ساتھ قلم کئے جانے کی سخت الفاظ میں مذمت کی ہے۔

ایران کے وزیر خارجہ محمد جواد ظریف نے شام میں امریکا اور مغرب کے حمایت یافتہ دہشت گردوں کے ہاتھوں بارہ سالہ فلسطینی بچے کو سفاکانہ طریقے سے قتل کئے جانے کے ویڈیو کے منظرعام پر آنے کے بعد اپنے ردعمل میں کہا ہے کہ مغربی ملکوں کے حمایت یافتہ دہشت گردوں کے ہاتھوں بارہ سالہ بچے کا سر قلم کیا جانا بظاہرایک معمول کا امربن چکاہے -

 وزیرخارجہ جواد ظریف نے اپنے ٹویٹر پیج پر لکھا ہے کہ اس گھناؤنے جرم پرمغرب کی خاموشی انتہائی حیرت انگیز اور معنی خیز ہے -

واضح رہے کہ چند روز قبل امریکا اور مغرب کے حمایت یافتہ دہشت گرد گروہ نورالدین زنگی نے انتہائی سفاکی کا مظاہرہ کرتے ہوئے شام میں ایک بارہ سالہ فلسطینی بچے کا سرقلم کیا اور پھر اس کی ویڈیوعام کردی - ستم ظریفی یہ ہے کہ امریکا اس دہشت گرد گروہ کو شام کی حکومت کا اعتدال پسند مخالف گروہ کہتاہے اور اس کی ہرطرح کی مالی اور اسلحہ جاتی مدد کرتاہے۔