رہبر انقلاب اسلامی کا زلزلے سے متاثرہ علاقوں کا دورہ
رہبر انقلاب اسلامی آیت اللہ العظمی سید علی خامنہ ای نے پیر کی صبح مغربی ایران میں کرمانشاہ کے علاقے سرپل ذہاب میں زلزلے سے متاثرہ علاقوں کا دورہ کرتے ہوئے تاکید کے ساتھ فرمایا ہے کہ حکام کو چاہئے کہ اور زیادہ امدادی کوششیں کریں اس لئے کہ اب تک انجام دی جانے والی کوششوں کے باوجود میں پوری طرح مطمئن نہیں ہوں۔
رہبر انقلاب اسلامی آیت اللہ العظمی سید علی خامنہ ای نے زلزلے سے متاثرہ علاقوں کا معائنہ کرتے ہوئے فرمایا کہ حکام نے بعض شعبوں میں اچھی کوششیں کیں اور بھرپور تعاون کیا اور زلزلہ آنے کے چند گھنٹوں کے اندرہی فوج اور سپاہ پاسداران انقلاب اسلامی زلزلے سے متاثرہ علاقوں میں پہنچ گئی اور ملبے میں دبے افراد کو باہر نکالنے کی کوشش اور مدد کرنا شروع کر دی مگر اس کے باوجود مجھے پوری تسلی نہیں ہوئی ہے اور مختلف شعبوں کے حکام کو چاہئے کہ وہ اور زیادہ کوشش اور جدوجہد کریں۔
آپ نے زلزلے سے متاثرہ لوگوں سے اپنے خطاب میں فرمایا کہ میری بہت خواہش تھی کہ خوشیوں اور آپ کی زندگی کے آرام اور پرسکون لمحات اور ایام میں آپ کے شہر میں آتا اور آپ جیسے مہربان و باوفا لوگوں سے ملاقات کرتا نہ یہ کہ ایسے غمناک موقع پر کہ جب لوگ رنج و غم میں مبتلا ہیں اور مصیبت میں گھرے ہوئے ہیں۔رہبر انقلاب اسلامی آیت اللہ العظمی سید علی خامنہ ای نے مقدس دفاع کے دوران صوبہ کرمانشاہ کے عوام کی استقامت اور ایثار و فداکاری کی طرف اشارہ کرتے ہوئے فرمایا کہ کہ یہ پہلی بار نہیں ہے کہ آپ جیسے مہربان و صابر لوگوں کے شہر اور اس شہر کے اطراف میں اس قسم کی مشکلات پیدا ہوئی ہیں آپ لوگوں نے مسلط کردہ جنگ کے دور میں بھی تمام تر مصائـب و آلام کے مقابلے میں اپنی بھرپور جرائت و ہمت اور استقامت و ثابت قدمی اور بہادری کا مظاہرہ کیا اور اب اس وقت بھی آپ سب اپنی اسی استقامت اور ہمت و حوصلے کا مظاہرہ کریں گے۔
رہبر انقلاب اسلامی آیت اللہ العظمی سید علی خامنہ ای نے فرمایا کہ دلیر اور بہادر لوگ ہی حادثات کے مقابلے میں استقامت کا مظاہرہ کرتے ہیں اور ان پر غلبہ پاتے ہیں بنابریں اگرچہ زلزلہ، بڑی بلا و مصیبت ہے جو تباہی و بربادی سے سب کو مصیبت زدہ اور داغدار بنا دیتاہے تاہم اسی زلزلے کو عوام کی استقامت اور ان کی سعی و کوشش کے نتیجے میں نئی حیات و زندگی اور ترقی کے لئے ایک نعمت میں تبدیل بھی کیا جاسکتا ہے۔رہبر انقلاب اسلامی آیت اللہ العظمی سید علی خامنہ ای نے فرمایا کہ اس حادثے نے پوری ایرانی قوم کو ہلا کر رکھ دیا اور ایران کے تمام علاقوں کے عوام نے دل سے کرمانشاہ پر توجہ مرکوز کر کے اپنی توانائی کے مطابق فرائض پر عمل اور زلزلے سے متاثرہ لوگوں کی مدد کے لئے قدم آگے بڑھایا ہے۔ قابل ذکر ہے کہ رہبر انقلاب اسلامی آیت اللہ العظمی سید علی خامنہ ای کا زلزلے سے متاثرہ علاقوں کا یہ دورہ ابھی جاری ہے۔
