ایران کی وزارت صحت نے اپنی تازہ ترین رپورٹ میں اعلان کیا ہے کہ کورونا وائرس سے متاثر اب تک پانچ ہزار سے زائد مریض صحتیاب ہو کر اسپتالوں سے اپنے گھروں کو لوٹ چکے ہیں۔

ایران کے نائب وزیرصحت علی رضا رئیسی نے بدھ کو تہران میں نامہ نگاروں سے گفتگو کرتے ہوئے کہا کہ ایران میں اب تک سترہ ہزار تین سو اکسٹھ افراد کورونا میں مبتلا پائے گئے ہیں جن میں ایک ہزار ایک سو پینتیس جاں بحق ہو چکے ہیں-

اس درمیان ایران کی حکومت اور مسلح افواج سمیت سبھی اداروں کے تعاون سے کورونا پر قابو پانے کے لئے قومی سطح پر مہم جاری ہے - کورونا کے خلاف قومی سطح پر جاری مہم میں عوام بھی پوری طرح شریک ہیں اور مریضوں کے ساتھ ان افراد کا بھی تیزی کے ساتھ پتہ لگانے کا عمل جاری ہے جو کورونا میں مبتلا مریضوں سے رابطے میں رہ چکے ہیں۔

کورونا وائرس اب تک دنیا کے ایک سو پینسٹھ سے زائد ملکوں میں پھیل چکا ہے اور دولاکھ سے زائد افراد اس خطرناک وائرس کا شکار ہوچکے ہیں۔ مجموعی طور پر پوری دنیا میں اب تک آٹھ ہزار افراد کو کورونا کے سبب اپنی جان سے ہاتھ دھونا پڑا ہے-