افغانستان میں طالبان کی عبوری حکومت کی وزارت داخلہ نے صوبہ دایکنڈی میں طالبان کے ہاتھوں 13 افراد کے قتل عام سے متعلق ایمنسٹی انٹرنیشنل کی حالیہ رپورٹ کو مسترد کردیا ہے۔

طلوع نیوز کی رپورٹ کے مطابق طالبان حکومت کی وزارت داخلہ کے ترجمان قاری سعید خوستی نے ایمنسٹی انٹرنیشنل کی حالیہ رپورٹ پر ردعمل کا اظہار کرتے ہوئے کہا کہ یہ رپورٹ غلط ہے اس لئے کہ اس میں طالبان کے موقف کا ذکر نہیں کیا گیا ہے اور اس قتل عام سے متعلق مستند دستاویزات بھی فراہم نہیں کی گئیں۔

واضح رہے کہ ایمنسٹی انٹرنیشنل منگل 5 اکتوبر کو اپنی ایک رپورٹ میں کہا تھا کہ طالبان گروہ نے صوبہ دایکنڈی میں 13 افراد کو ہلاک کیا تھا جن میں 2 عام شہری بھی تھے۔