SAHAR

عراق کی عدالت نے داعش کے سابق سرغنے ابوبکر بغدادی کی بیوہ کو سزائے موت سنائی ہے۔

سحرنیوز/عالم اسلام: غیرملکی میڈیا کے مطابق ابوبکر بغدادی کی پہلی اہلیہ اسما محمد کو دہشت گروہ کے ساتھ کام کرنے، انسانیت کے خلاف جرائم اور خواتین کو اپنے گھر پر قید رکھنے کے جرم میں سزائے موت سنائی گئی۔ عراق کی سپریم جوڈیشل کونسل کی جانب سے جاری بیان میں کہا گیا ہے کہ ابوبکر بغدادی کی اہلیہ نے ایزدی خواتین کو موصل میں اپنے گھر میں قید کیا تھا۔
غیرملکی میڈیا کے مطابق ابوبکر بغدادی کی بیوہ عراقی سیکیورٹی اداروں کی حراست میں ہے۔ اس کی سزائے موت پر عملدرآمد عراقی اپیل کورٹ کی توثیق کے بعد ہوگا۔ واضح رہے کہ داعش کا سرغنہ ابوبکر بغدادی 2019ء میں امریکی فورسز کے حملے میں ہلاک ہوگیا تھا۔